經常都希望喺日本工作定居嘅朋友，機會嚟喇！雖然空有希望，卻覺得冇一技之長，只有一股牛力難以喺日本揾工作？呢個職位為你而設！日本愛知縣旅遊觀光公社就公開招募全職忍者，除咗本地人之外，外國人一樣歡迎，忍者嘅職責就係喺各大旅遊景點充當攝影工作，即係跟遊客合照。至於點樣成為忍者？觀光公社表示唔需要有任何相關經驗，因為成功錄取嘅話會得到1個月嘅訓練，學習忍者嘅基本技巧，至於取錄條件，一定要身手敏捷、頭腦靈活，最好要懂得打後空翻同跳舞，不限性別、國籍，需年滿18歲，懂日語，外國人嘅話就必須懂流利英語，而且熟讀日本歷史，才可以跟遊客介紹當地嘅文化歷史。月薪方面約為港幣$12,000，試用期4個月。希望喺日本工作同定居，而又自問身手了得，又希望喺自己履歷表上加上「忍者」一項嘅話，切勿錯過！
Comments
Post a Comment