【奇聞趣事】【五大執行李妙法】


1. USB插蘇

喺而家呢個年代,大部份嘅差電線都係用USB頭再轉, 所以不妨帶個多插口嘅USB國際插頭,同時隨行電器嘅線全部都換咗USB插頭,咁就唔使得個國際轉插又要插幾萬樣,又方便又快捷。

2. 一山藏二虎

好多時去旅行,行李最冇位放嘅就係啲衫褲鞋襪,所以大家不妨運用收納嘅方法,例如女仔就可以將內褲捲好放喺bra嘅入面,再上下對接個bra,慳返個位又可以防止變形。皮帶都係同樣道理,捲好再放喺衫領位。

3. 首飾妙法

對於女士們嚟講如果去旅行要帶首飾都係幾麻煩,拎個首飾盒會晒位,唔拎又會放到好亂驚整爛,如果係頸鏈可以將頭尾攝喺飲管嘅頭未,耳環就可以將一對勾喺一粒鈕上面,另外可以嘗試用藥盒做首飾盒,慳位又方便攜帶。

4. 衫褲先分類

好多人都習慣將衫褲用一個大袋裝起,其實不妨先將每日要着嘅衫褲一日一日咁分開放好,咁就可以慳返時間唔使到時再心思思諗要着啲乜,唔係一陣摷完又要重新執過。

5. 一切從簡

如果係以背包客方式去旅行,最好就所有野都從簡,用一次性嘅沖涼液同洗頭水又或者二合一嘅洗頭水,就可以慳返啲位,另外所有lotion可以用con盒裝。 如果有貴重嘢就用厚外套先將貴重嘢包好,重嘢就放喺背囊嘅最底部,會令到重力嘅分布比較平均。






Comments