【日本】【深入北海道夕張蜜瓜拍賣會】


Do姐鄭裕玲上輯帶藝人同事暢遊英、法、澳,大掃高級時裝、貴價食材、限量潮物,盡顯品味。今年《Do姐再Shopping》,好拍檔陸永、C君兩隻吊靴鬼,跟實Do姐四出購物,學做上等人。三位主持邀請黃翠如、馬國明、蕭正楠做旅伴,分別前往日本、丹麥、意大利逛名店,推介時尚高檔品牌;仲品嚐頂級名菜,遊覽歷史景點,從中感受當地濃厚嘅文化氣息。

Do姐帶農夫、翠如到生果店,了解日本生果,順道吸收日本送禮文化。店舖有專人評定蜜瓜價格,陸永竟從生果專家嘅專業手法,搵到Do姐嘅影子。四人品嚐「高纖自助餐」,任食水果、甜品,原來呢度「着數」只益女士?四人轉去北海道前,Do姐帶路登上建造費達100億日元嘅豪華火車,見識非一般「貴賓式」服務。

北海道夕張蜜瓜祭係年度盛事,拍賣會場有如迷你年宵。正當農夫、翠如陶醉喺琳琅滿目嘅美食佳餚之際,突然被命令輪候免費「平安瓜」。Do姐品嚐特產後,突然提出「食得唔好嘥」,翠如心知不妙,立即護面。

四位「大鄉里」喺日本言語不通,「盲舂舂」參加蜜瓜拍賣會,胡亂競投下可有「蝕底」?富良野蜜瓜小食精心製作,享譽全球,主持卻偏要喺「蜜瓜裏挑骨頭」!

▼ 深入北海道夕張蜜瓜拍賣會



Comments