【瑞典 赫爾辛堡】【「失敗博物館」展出全球失敗產品】



▲ 高露潔牛肉口味嘅千層麵,成件事錯晒。

呢個世界上有好多博物館,大部份都係收藏精美展覽品嘅博物館,不過大家有冇諗過仲有失敗嘅博物館?所謂嘅失敗唔係講緊個博物館好失敗,而係個博物館係展出一啲「失敗嘅例子」,到底有啲咩失敗都要展出咁誇張,一齊去睇下啦。

呢間「失敗博物館」喺瑞典南部嘅赫爾辛堡,搜羅咗全世界各地最失敗嘅案例,由個體戶到專業人士嘅案例都唔放過!收藏家Samuel West可以話係對失敗嘅事物有一種着迷,經典例子有難食嘅牛肉千層麵同皮革味嘅香水等等。

失敗博物館展出好多大品牌嘅跨界案例,大家成日用嘅高露潔牙膏,曾經喺80年代推出牛肉口味嘅千層麵,不過最終面臨失敗嘅業績。2006年左右,可口可樂都推出過咖啡口味嘅可樂,不過只係維持到兩年就bye bye 。

Samuel West作為世界上最了解失敗嘅人,就話設立呢個博物館係希望醒大家對「失敗」唔好抱有負面嘅睇法,因為人生在世難免犯錯,從錯誤中學習,係走向成功嘅唯一道路,如果唔識得喺失敗中學習,只能注定失敗。大家去瑞典旅遊,記得要去參觀啦。

Museum of Failure
地址:Södergatan 15, Helsingborg, Sweden
參觀時間:星期二至日 12:00 - 18:00
     星期一休息



▲ 咖啡口味嘅可樂,小編又有興趣試下。



▲ 創辦人Samuel West



Comments