【美國 底特律】【300美金租別墅 住滿7年送埋間屋】


香港樓價每日升,大家都睇到麻目晒,想上車嘅年輕一代根本望眼欲穿,毫無方法可言,等政府出辣招?等到你下世都未跌啦!美國底特律就同樣有上車難呢個問題,不過勝在有慈善團體,就喺一個小社區上建咗25間小別墅,有花園有後園有閣樓,一間別墅每月月租只係300美金,而且只要你租滿3年就得到部分業權,租滿7年,仲連間屋都直接送埋畀你!呢個Project係由慈善團體CCSS負責,其實用意係幫助幾類急需房屋嘅家庭人士,包括仔女眾多嘅家庭、孤兒院長大嘅青年、無退休金嘅老人、二按爆煲後失去房屋嘅家庭,推出宣傳以嚟,就已經火速收到600個申請喇!負責人就話希望呢批房屋帶畀人嘅唔止係一個家,仲係一個希望,更加係一個完整嘅社區生活,大家共同建立一個良好嘅居住環境。好多人會質疑,長貧難顧,窮人又點樣負擔到每月300蚊嘅租金?原來喺美國,有一個固定居所,可以話係脫貧第一步,有固定居住,先會有正當嘅工作請你,有銀行肯借錢畀你,交房租甚至可以豁免部分消費稅!即係話,要脫貧,就必須解決住屋問題,所以CCSS呢個方法既治標又治本。呢個計劃火速得到眾多善長人翁贊助,籌到125萬美金嘅建築費用,出錢又出力,派人幫手起屋。














Comments