【養生保健】【痛風症發作 日飲10杯水排尿酸】


痛風患者要飲「齋湯」?唔可以食豆腐、冬菇、荷蘭豆?營養師指出,唔少人對痛風症嘅飲食有誤解,患者擔心要一世戒口,令飲食變得枯燥乏味。其實病人並唔需要全天候或永久戒口。按臨床經驗,建議一般病人喺病發期間至關節消腫後一周內,避免食高嘌呤或中嘌呤食物,包括濃肉湯、濃汁,如牛腩麵嘅腩汁、米線嘅豬骨湯底、打邊爐嘅湯底;動物內臟、鵝肉、帶子、青口;同埋避免食牙帶魚、沙甸魚、全麥產品同乾豆等,其他如豬、牛、雞可如常同適量食用。當關節消腫後兩星期至3個月,差唔多可恢復正常飲食,但部份食物要限制份量,如菇類、乾豆 (即紅豆、綠豆、黃豆、眉豆等)、海產 (魚除外) 或果仁,建議每星期最多食一次;菇類、乾豆同果仁每次最多食1湯匙;海產唔多於3両。菠菜、莧菜、椰菜花每周最多食一次,每次唔多於三分之一碗,以煮熟計算。至於荷蘭豆、甜豆、豆角同青豆屬於新鮮蔬菜,不屬乾豆類,任何時候都可以食。消腫後3個月,則可完全恢復正常飲食。痛風病人平日需充足飲水,可幫助排走尿酸。營養師建議平日要飲至少6杯至8杯水,病發期每日飲10杯或以上,飲用清茶、清湯亦可。攝取足夠蔬果有助身體吸收水份,建議可以食青瓜、車厘茄、生菜同西瓜。每日進食3份蔬菜,即煮熟蔬菜1.5碗,或生嘅蔬菜如沙律菜3碗,另加兩份生果,每份如一個拳頭般大小。進食鈣質豐富食物同樣有助排走尿酸,如脫脂或低脂奶、低脂芝士,每日飲一至兩杯奶。布包豆腐、板豆腐,為高鈣食物,病人喺非發作期宜適量食用。營養師推介痛風患者平日可以自製小食,包括用脫脂奶、番薯同亞麻籽製作「亞麻籽番薯奶昔」作下午茶,其中脫脂奶含鈣、番薯纖維豐富,亞麻籽則含奧米加3脂肪酸有消炎作用。



コメント

今週熱門文章